Tan ka pasé de Hector Poullet

Gwadloup tini onlo mèt-a-manniòk. Mi èktò poulèt ! i ka di zòt bon lanné

Tan ka pasé
Tan ka vansé
Tan-la toujou présé-présé
2007 pres fini kasé
2008 li kay konmansé
Mi ba-zot sa nou mandé :

Ba-zot titak tan
pou zot jwi-lavi
pou tjè-zot kontan
ba-zot sa zot anvi !
Douvan pot-zot balié makakri
pou viv on Nwel-zéklari !
On lanné douslèt
on bol toloman
san jen bésé tèt
san pon batmanman !
Nou ka mandé lavi-la ba-zot tan viv
Tout bèl driv san pon dériv !
Pasé on bèl Nwel épi on bien bon bèl lanné !

Hector Poullet
22 décembre 2007 

texte : www.potomitan.com
photo : www.gensdelacaraibe.com